家穎笑容甜美，回答問題時，總是帶點害羞，但一問到有關考車及巴士的問題時，她卻自信滿滿地回答，「我揸過 10.6米、 11米及 12米等長度嘅巴士，而我最鍾意揸 12.8米，因為新車感覺好舒服，雖然佢比一般巴士長，但經多次練習後就會習慣。」她對揸巴士的熱誠，毫不輸蝕給男士。 

家穎於今年 3月 30日入職，現主要負責駕駛 5條巴士路線，包括 8X、 19、 780、 788及 789，她最常駕駛的 789號是由小西灣開住金鐘的路線，這令她在網絡上紅極一時。「可能比較少女仔做車長，所以好多人會嚟影我相，更加有巴士迷會員嚟坐我揸嘅車。」 

不理解巴士迷行為 

對於巴士迷的行為，家穎當初覺得有些不解，但只要不影響她工作便可，「順便可以訓練自己嘅專注力。」她指在 facebook上有很多人加她當朋友，想了解她的工作，有見及此，她便在 4月開設了「家穎的巴士生涯」的專頁，分享日常的工作，現時關注人數已超過 1萬。 

有次家穎在專頁上分享當夜班時，遇到醉酒乘客不醒人事，她覺得女車長畢竟不及男士壯健，要懂得保護自己，所以拍一拍該名乘客沒反應後，她便找男車長幫忙喚醒醉酒乘客，協助他落車。每個家穎分享的工作點滴，都有不少人回應，她更表示有粉絲會在專頁上私訊她，然後翌日專程搭她的巴士，「有啲都幾熱情，會要求合照，但太過親近或有過份要求時，我就會大聲少少喝止，有時要惡啲先得。」 

車長的工作當然是接載乘客，並安全將大家送往目的地。其實在每次出車前後，家穎都需要先做一輪準備工作，才可出發。「要檢查車廂座位有冇損毀、有冇失物遺留、開車前要調校倒後鏡及側鏡、設置八達通機、檢查路線牌及報站器等。」 

考了大巴牌 

80後的家穎，並非從小便是巴士迷，在中學畢業後，她從事了飲食業近 10年，但因工時太長，故希望有新的嘗試。她喜歡駕駛，於 4年前考了車牌，「考咗車牌滿 3年後，可以考商用車牌，於是我上年又考埋大巴牌。本身想試吓揸保姆車，但經驗唔夠冇人請。我師父話城巴請車長，就叫我去試試。」家穎一心想轉換工作環境，最終亦幸運地如願以償獲聘用。 

雖然已考取貨車牌，但巴士的體積相對地大太多，工作訓練的第三日，已令家穎有點氣餒，萌生放棄的念頭。「巴士比私家車及貨車大兼長，無論泊車、倒後及轉彎都要預多啲位，行車時要對準跟線行，同時仲要兼顧好多儀器操作，好似燈掣、報站器及標板等，真係好難適應。一開始我仲未搞清楚『左彎偷右』及『右彎偷左』呢啲技巧，好想放棄。」 

克服咗困難後，就想堅持落去。

家穎自言慶幸家人有揸大型車的經驗，可以向他們請教，「男朋友用揸車嘅 game嚟教我，爸爸直接用佢架車嚟示範畀我睇，我慢慢明白當中嘅原理，克服咗困難後，就想堅持落去。」 

跑馬地山路窄 

家穎堅持走上巴士之路，她亦有很多難忘的經歷，細數種種時，她表示每一次都令她有所成長，「學揸 19號去跑馬地上嘅路線時，啲山路好窄，啱啱揸嗰陣真係好驚，滴晒汗！如果揸得慢，後面嘅私家車拉晒龍，令我有啲壓力，但熟能生巧，宜家已經冇呢啲問題。我最難忘係接載坐輪椅嘅乘客，以前見過其他車長會親自推上推落，所以我都會咁做，仲會同佢哋講聲身體健康，佢哋次次都好開心。」

在一架巴士中，有百多名乘客，返工放工繁忙時段的車廂內，總會擠得水泄不通，人多自然磨擦多，家穎表示有處理過乘客嗌交的事件，「試過揸揸吓車，聽到後面好嘈，原來有兩個女人鬧交，於是我埋站後就去睇吓佢哋有乜嘢需要，原來係冷氣太凍嘅問題，我提議其中一位換位，好彩好快平息。如果有涉及打交，我就要 call控制中心。」

本文獲《蘋果日報》授權轉載